ශ්රී ලංකාවේ මැණික් කැණීම් වැඩි කිරීම.

ශ්‍රී ලංකාවේ මැණික් අපනයන කර්මාන්තය මෑත වසරවල කැපී පෙනෙන වර්ධනයක් ලබාගෙන ඇත. 2019 සහ 2024 අතර මැණික් අපනයනයෙන් උපයාගත් වාර්ෂික ආදායම පිළිවෙලින් ඇමරිකානු ඩොලර් මිලියන 321 ක් සහ ඇමරිකානු ඩොලර් මිලියන 312 ක් (2024 ජූලි මස දක්වා) විය. වසර අග වන විට ඇමරිකානු ඩොලර් මිලියන 500 ඉක්මවීමට අපේක්ෂා කිරීම තුළින් අපනයන ආදායමේ සුළු වැඩිවීමක් පෙන්නුම් කරයි. ඉදිරිය දෙස බලන විට, ජාතික මැණික් හා ස්වර්ණාභරණ අධිකාරිය අපේක්ෂා කරන්නේ මැණික් අපනයනයෙන් ලැබෙන වාර්ෂික ආදායම 2025 වර්ෂ අවසානයේ ඇමරිකානු ඩොලර් බිලියන 2 දක්වා ළඟා විය හැකි බවයි. එය කර්මාන්තයේ සැලකිය යුතු ව්‍යාප්තියක් සඳහා ඇති හැකියාව පිළිබිඹු කරයි. අලූතින් පිහිටවනු ලැබූ රජය මැණික් අපනයන වෙළඳාමෙන් ලැබෙන ආදායම වැඩි කිරීමට සැලසුම් කර ඇතත්, සීමිත ගවේෂණ, නියාමන සීමාවන් සහ පාරිසරික ගැටලූ අපේක්ෂිත ඉලක්කයට ලගාවීම සදහා බාධා ඇති කරයි. අභියෝග සඳහා යෝග්‍ය විසඳුම් ලබා දීම සඳහා රජයේ ආයතන සහ මැණික් වෙළෙන්දන් හා පතල්කරුවන් අතර ඇති අඩුපාඩු හඳුනා ගැනීම සහ සම්බන්ධීකරණය සඳහා ඉහළ පෙළ කමිටුවක් පිහිටුවීමට ජාතික මැණික් හා ස්වර්ණාභරණ අධිකාරිය (NGJA) සහ මැණික් හා ස්වර්ණාභරණ පර්යේෂණ හා අභ්‍යාස  ආයතනය (GJRTI) තීරණය කර ඇත.